Davao del Norte – Patay ang duha ka mga senior citizen human naligsan sa usa ka van samtang nanabok sa kalsada sa Carmen, Davao del Norte sa niaging gabii.
Giila sa mga kapulisan ang mga biktima nga sila si Margin Calamba 62 anyos, ug si Remedios Sarte, 68 anyos ug sagad residente sa Prk. 4, Manyaki, Tibungol, Panabo City.
Base sa inisyal nga imbestigasyon, gimaneho ni Raphen Magbuanua 27 anyos ug residente sa Prk. 2, Kimamon, Sto. Tomas, Davao del Norte ang usa ka Foton Turbo Van ug gilatas ang dalan padulong sa Poblacion, Carmen nga nag gikan sa Panabo City sa dihang nabanggaan niini ang patabok nga mga biktima.
Sumala sa report, Nakahiagom ang mga biktima og samad sa nagkadaiyang parte sa ilang mga lawas hinungdan sa ilang kamatayon.
Dugan niini nga gisulayan pa sa mga rescuer og dala ang mga biktima sa ospital apan gideklarang dead on arrival.
Sa kasamtangan, nakakustodiya na si Magbanua lakip na ang sakyanang gimaneho niini sa Carmen MPS samtang gihan-ay pa ang posibleng kasong atubangon niini. (Camille Santos Naraga)
(Source: Panabo PNP)