Nausik ang daghang oras sa mga pasahero ug awtoridad sa Bohol-Panglao International Airport human dunay duha ka mga pasahero nga nagbinuang og bomb threat sa sulod sa Cebu Pacific Flight 5J617, kagahapong adlawa, Marso 22, 2025.
Matod sa mga report, usa ka flight attendant nakadungog sa panag-estorya sa duha ka pasahero nga may kalabotan sa bomba.
Aron masiguro ang kaluwasan sa tanan, gipahunong ang mga pasahero ug gipatuman ang hugot nga inspeksyon sa eroplano ug mga bagahe. Ang duha ka pasahero gidala sa kustodiya sa kapulisan alang sa imbestigasyon.
Pagkahuman sa hugot nga pagsusi, gikompirma sa mga otoridad nga walay tinuod nga hulga sa seguridad, ug ang flight operations normal nga napadayon.
Tungod sa panghitabo, gipahinumduman sa CAAP ang publiko nga ang pagbuhat og bomb jokes usa ka seryosong sala ilawom sa Presidential Decree No. 1727. Ang mga mosupak sa balaod mahimong silotan og hangtod lima ka tuig nga pagkabilanggo o multa nga moabot sa PHP 40,000.
Ang mga pasahero gidasig nga magpakabana ug magmatngon sa ilang sinultihan aron malikayan ang kasamok ug masiguro ang luwas nga pagbiyahe sa tanang tawo. (Renante Socia Lada)