Human subo nga mahibaloan ni Gobernador Bambi Emano nga duha ka mga Misamisnon ang nalakip sa nakabsan sa kinabuhi atol sa pagkahagsa sa C-130 military aircraft sa Sulu gilayon nga gipasalig sa amahan sa lalawigan nga magpaabot og ₱ 50,000 nga hinabang ang Kapitolyo Probinsyal alang sa ilang mga pamilya.
Gikumpirma sa 58th Infantry Battalion nga apil sa 47 ka military personnel nga namatay sila PFC Carlo D. Dapanas Jr. nga taga Manticao ug SGT Butch D. Maestro sa lungsod sa Balingoan ang nakabsan sa kinabuhi atoll sa pagkahagsa.
Gisugdan na karon ni Gobernador Bambi ang koordinasyon ngadto sa 58th IB aron direktang mahatag ang ₱ 50,000 nga tabang ngadto sa pamilya sa mga biktima.
Bisan paman sa kasubo nga adunay nakalas nga Misamisnon nga giilang bayani mapasalamaton gihapon og dako ang Gobernador human gikonpirma sa Gingoog City nga luwas ug anaa na nagpahuway sa ospital ang laing tulo ka Misamisnon nga apil sa nahagsa nga C-130.
Luwas na karon sila PVT Jerson Piloton, PVT Jeriel Araneta ug PVT Vincent Paul Bandalan, pulos mga residente sa Gingoog City.
Isip mga kaabag sa pagpatuman sa seguridad sa lalawigan kanunay nga gisuportahan ni Gobernador Bambi ang kasundalohan hinungdan nga iyang ikasubo ug dako kung adunay mga dili tiaw nga dangatan kanila ug sa panahon karon nga adunay dakong hagit sa pwersa sa armadong kusog anaa siya andam moabag ug mosuporta. (Jebsen D. Patlunag)
(Source: Misamis Oriental Provincial Information Office Facebook page)
