Zamboanga del Sur – Naposasan gilayon ang duha ka batan-on sa gipahigayon nga Drug Buy-Bust Operation sa mga kapulisan sa Station Drug Enforcement Team kon SDET sa Pagadian City Police Station sa pagpangulo ni Police Lieutenant David Amil Pintado, kauban ang 2nd Provincial Mobile Force Company – Zamboanga Del Sur nga gipamunoan ni Police Staff Sergeant Prometheus Remolador, Margosatubig Municipal Police Station (MPS), Dumalinao Municipal Police Station (MPS), Midsalip Municipal Police Station (MPS) ug sa Provincial Drug Enforcement Unit – Zamboanga Del Sur, sa may Purok Rosas, Barangay San Pedro Pagadian City, alas 11:30 sa buntag kagahapong adlawa. Ang mga suspetsado naila nga sila Jomaili Hjalal Jamil, 20 anyos ug residente sa Purok 3, Sigayan, Sultan Naga Dimaporo, Lanao Del Norte ug usa ka Mohaimen Maruhom Balao, 20 anyos, lumulupyo sa Barangay Ilian, Sultan Naga Dimaporo, Lanao Del Norte.
Nakumpiska gikan sa posesyon sa duha ka dinakpan ang 6 ka gagmay nga plastic straw sa gituohang shabu, 2 ka lighter, duha ka aluminum foil, usa ka coin pouch, usa ka libo ka pesos isip mark money, ug usa ka unit sa Suzuki Raider, kolor itum ug pula nga nagdala sa plaka numero 2738-kw. Matud sa duha nga igo ra sila gisugo nga ihatud ang maong druga gikan sa Lanao paingun diri sa syudad sa Pagadian aron mahatag sa mikontak kanila aron paliton kini, dugang pa nga igo ra usab sila namorsyento sa maong druga. Samtang ang mga suspetsado ang gidala sa kapulisan sa Pagadian City Police Station alang sa dokumentasyon ug tukmang desposasyon. (Wendel Cabrera)