Mibisita sa Tagoloan, Misamis Oriental si Department of Public Works and Highways (DPWH) Undersecretary Charles T. Calima Jr. alang sa coordination meeting ug follow-up inspection sa Tagoloan Bridge.
Atol sa inspeksyon, gibutyag ni Calima nga naningkamot na ang DPWH nga mahatagan og budget ang maong tulay alang sa 2027. Matud pa niya, komitado usab si DPWH Secretary Vince Dizon nga masulbad ang mga kinahanglanon alang sa proyekto ug gipasaligan ang mga Tagoloanon nga paningkamotan sa ahensya nga malihok kini sa labing dali nga panahon.
Gibutyag usab ni Calima nga gawas sa Tagoloan Bridge, adunay ubang mga tulay nga apil sa priority plan sa Northern Mindanao, lakip ang mga proyekto sa Cagayan de Oro, Iligan City ug Valencia City, Bukidnon.
Ang pagbisita ni Calima gihimo isip follow-up sa naunang inspeksyon ni DPWH Secretary Vince Dizon sa Tagoloan Bridge niadtong miaging semana.