Cebu City – Nagpasiugda og imbestigasyon ang DOT o Department of Tourism batok sa Plantation Bay Resort and Spa sa Marigondon, dakbayan sa Lapu-Lapu labot sa dili maayong pagtagad sa usa ka inahan ug iyang anak nga adunay special needs.
Base sa statement, ang DOT miingon nga human sa notisya ug hearing, mag-atubang og tukmang administrative sanctions ang tagduma sa resort.
Ang DOT makiglambigit usab sa DOJ o Department of Justice labot sa buhatong aksyon subay sa Disability Law.
Una niini, ang resident shareholder sa resort, Manny Gonzalez, nakadawat og pagsaway gikan sa mga netizens ug ang isyu miabot pa kang journalist Karen Davila ug kang Sen. Joel Villanueva nga nagpasidaan og Senate inquiry.
Segun sa tweet ni Davila, iyang gibirahan si Gonzales sa dili maayong pagtagad sa inahan ug anak nga may autism ug ang gipakita niining kinaiya makaguba sa industriya sa turismo.
Midason usab si Villanueva pagmakmak kang Gonzales sa iyang tweet nga dili kini angayan sa tourism industry.
Kini human mag-post si Mai Pages, ang inahan sa bata, og dili maayong review ug mihatag pa og one-star rating sa resort’s page sa Trip Advisor ug misaway sa gipakitang aksyon sa mga lifeguards. (Jhon Tadlip/JTY, photo courtesy of Trip Advisor)
(Source: Department of Tourism)