Cagayan de Oro City – Agig pagsanong sa rekomendasyon sa National Task Force on COVID-19, ang Department of Health X ang nag-awhag sa local government units (LGUs) sa pagpalig-on sa ilang kapasidad ug gidaghanon sa contract tracing teams aron mopalambo pa ang mga lakang sa pagpakgang sa pagkuyanap sa coronavirus disease (COVID-19).
Atol sa gipahigayon nga NormIn-COVID-19 Response Task Force press conference kagahapon, si DOH X Regional Director Dr. Adriano Subaan nagsugilon nga si NTF on COVID-19 Contact Tracing Czar ug Baguio City Mayor Benjamin Magalong nagrekomendar nga adunay ipahimutang nga anti-COVID Czars aron makatutok sa mga estratihiya, prevention, detection, treatment isolation ug reintegration program sa gobierno.
Dinhi sa syudad sa Cagayan de Oro, gisugilon ni Suba-an nga kadaghanan sa Covid-19 cases gikan sa locally stranded individual ug returning overseas Filipinos, mao nga limitado lamang ang practice sa local contracts sa mga dapit nga adunay pagsaka sa local transmissions sama sa dakbayan sa Iligan, Balingasag sa Misamis Oriental ug Linamon ug Matungao sa Lanao del Norte, gikinahanglan gayod ang pag-increase sa gidahanon sa contact tracing teams.
Ang maong team padayon nga nagsugyot sa pagsunod sa Magalong formula diin adunay usa ka positive case kinahanglan nga adunay 37 ka case findings. Ang LGU gidasig usab sa paggamit sa teknolohiya diha sa ilang himuong contact tracing aron paspas ang trabaho ug makakuha sa tukma nga impormasyon. (Philippine Information Agency X)