Cagayan de Oro City – Dili man tuod direkta nga may kalambigitan sa COVID-19 ang suicide cases apan hugot kini nga gitutukan sa Department of Health, Region 10. Mao kini ang gisugilon ni Dr. Adriano Subaan, director sa DOH-10 atol sa gipahigayon nga COVID-19 inter-agency press conference dugtong sa sunod-sunod nga report sa suicide incidents dinhi sa rehiyon.
Nasayran nga gikan Enero niining tuiga hangtud kagahapon, moabot na sa 102 ka suicide cases sa tibuok region 10, diin matud pa ni Dr. Subaan nga ang mental health mao ang nag-una nila nga concern.
Matud pa ni Dr. Suba-an, aduna silay 24/7 hotlines alang niadtong mga nanginahanglan sa maistorya.
Matud pa ni Jaymee Leonen, ang namuno sa mental health and psycho-social sa City Social Welfare and Development nga ang Covid-19 adunay direktang epeko sa panghuna-huna sa tawo bisan unsa pag-edad, gender ug status sa kinabuhi. Giadmitir ni Leonen, nga aduna gayoy pagsaka sa kaso sa mental health condition nga nagsumikad sa kahadlok, kasuko, anxiety ug depression.
Sila nanawagan sa mga sakop sa media pag edukar sa mga listeners apil na usab sa mga magtutudlo nga isukip sa online mode of instruction group activities aron madevelop ang inter-personal interactions, social and leadership skills. (City Information Office)
(Photo courtesy of City Information Office)