Walay usa sa 45 ka bag-ong kaso sa coronavirus disease kun Covid 19 sa nasod ang gikan sa rehiyon 7.
Kini ang giklaro ni Direktor Jaime Bernadas sa Department of Health kun DOH-7 atol sa press briefing gahapon.
Sumala pa ni Bernadas, ang Research Institute for Tropical Medicine (RITM) wala pay gibalik nga positibong resulta sa mga sample nga ilang giduso.
Pagka karon, ang DOH-7 nakatala og  76 ka tawo nga adunay influenza-like illnesses kun ILI sa rehiyon.
Kini gilangkoban sa lima ka pasyente sa Bohol, unom sa Cebu; 13 sa Negros Oriental, tulo sa Siquijor, napu sa Cebu City, duha sa Lapulapu City ug 37 sa Mandaue City.
Hinuon, gitataw ni Bernadas nga ang naasoyng mga ILI dili maisip nga PUI kun patients under investigation sa Covid 19 ubos sa protocols sa DOH Central Office.
Ang mga PUIs, ubos sa DOH protocols, mao kadtong adunay history sa kontak nga adunay kompirmadong kaso o adunay travel history sa Covid-infected areas.
Apan ang DOH-7 miingon nga ilang gipalapdan ang ilang monitoring ug surveillance diin giapil ang tanang tawo o pasyente nga naadmit sa ospital nga nagpakitag sintoma sama sa flu o hilanat.