Cebu City- Subling giklaro sa Department of Health kun DOH-7 nga luwas nga biyahean ug suroyan Cebu ug tibuok rehiyon 7 taliwa sa hulga sa Coronavirus Disease kun COVID-19.
Sa giluwatang press statement, gipaneguro sa DOH 7 sa publiko nga safe sa mga biyahedor ug ubang bisita ang pag-okupar sa mga hotel ug resort sa Central Visayas.
Gipahibawo usab sa DOH 7 nga ang 26 ka Koreano nga miabot sa Sugbo gikan sa Daegu City niadtong Pebrero 25 baskog og lawas ug walay timailhan sa sintoma sa virus.
Giluwatan sa DOH-7 ang maong katin-awan nunot sa taho nga nag-alegar nga ang mga langyaw nataptan sa sakit.
Una niini, ang DOH-7, uban sa kadagkoan sa Hotel, Resort, & Restaurant Association (HRRAC) mipasalig nga ang Sugbo nagpabiling luwas sa Covid 19 ug misalikway sa pangangkon sa pipila ka netizens.
Gikompirmar usab sa DOH-7 ang nag-viral nga video nga nagpakita sa dokumento nga nagda sa mga detalye sa 26 ka turistang Koreano.
Naglakip kini sa ilang tibuok ngan, edad ug mga hotel nga ilang gisak-an ug gipuy-an.
Hinuon, gipahinumdoman sa DOH-7 ang katawhan nga ang hulagway nga nagda sa dokumento pabiling confidential tali sa ilang buhatan ug sa nahitungdang mga ahensiya ug establisimento.
