Cebu City – Gibutyag sa Department of Health (DOH) 7 nga dili usa ka accredited isolation facility ang Hoops Dome nga nahimutang sa Barangay Gun-ob Syudad sa Lapu-Lapu.
Matod sa tigpamaba sa DOH 7 Dr. Mary Jean Loreche nga nasuta sa Accreditation & Licensing Division sa Department of Health o DOH 7 nga ang Hoops Dome wala mo apply isip isolation facility, ug usa lang kini ka holding area.
Sa nasayran, usaka 36 anyos nga OFW o overseas Filipino worker ang namatay niadtong Biyernes.
Si Ramon Castro, nga lumad sa Toledo City, gitakda na untang ipagawas human sa 14-ka-adlaw nga kwarantina sa isolation facility dihang kalit lang giatake sa kasingkasing.
Gitakda untang mobalik sa Middle East si Castro ug kinahanglang ipaubos sa swab test sa dili pa makabiyahe.
Una siyang gibutang sa usa sa mga hotel sa Lapu-Lapu samtang magpaabot sa test ug dihang nagpositibo sa covid 19 gibalhin sa Hoops Dome.
Si Dr. Mary Jean Loreche, tigpamaba sa DOH 7, miingon nga ang mga quarantine ug isolation facilities kinahanglang mosunod sa specific standards aron pagseguro sa kaluwasan sa mga pasyente.
Samtang si Mayor Junard Chan mimando sa pagpalapad sa layout sa isolation center ug dugangan ang personnel sa isolation area sanglit ang Hoops Dome aduna lay usa ka entrance ug exit ug gibantayan sa usa lang ka nurse. (Jhon Tadlip/JTY)
(Source: Department of Health 7, photos courtesy of DOH 7 | contributed photo)
