Cebu City- Posibleng mag-atubang og kaso ang usa ka optometrist o doktor sa mata tungod sa pagpakatap og sayop nga balita bahin sa Corona Virus Disease kun Covid 19.
Mao kini gitug-an sa hepe sa Regional Anti-Cyber Crime Unit kun RACU 7, Col. Marlo Castillo.
Sumala pa ni Castillo, dili lang una niya nganlan ang akusado samtang wala pa man ikasang-at ang kaso.
Sa nasayran, nag-post ang doctor sa Facebook bahin sa usaka langyaw nga hitaptan sa Covid 19 nga naadmit sa ospital sa dakbayan sa Mandaue.
Segun sa pa fake news, namatay ang pasyente sa nahisgotang balatian apan dihang gisusi ang kadagkoan sa ospital nasuta nga dili diay kini tinuod.
Milusad dayon ang RACU 7 og online investigation pinaagi sa cyber patrolling ug sa abag sa mga tawo sa social media nahibaw-an ang nahimutangan sa responsable.
Midugang si Castillo nga nagpasiugda silag imbestigasyon ug nagpadag tracker team sa mga imbestigador pagsusi sa UCMed ug nasuta nga fake news ang gi-post sa social media.
Napaubos na sa pagsukit-sukit sa mga imbestigador sa RACU -7 ang naasoyng optometrist.
Giangkon niini nga nakadawat siyag impormasyon labot sa langyaw nga na-admit sa maong tambalanan ug namatay apan wala lang niya ma-verify ang nadawat nga kasayoran.