Gibutang ubos sa higpit nga pagbantay ug monitoring sa nagkalain-laing disaster teams sa Sugbo ang mga flood-prone areas sa lalawigan epekto sa pagsulod sa tropical depression Samuel sa nasud. Apektado ang Eastern Visayas lakip sa amihanang bahin sa Sugbo sa bagyong Samuel tungod sa lapad niini nga diameter nga moabot og 350 kilometros, matud pa sa PAGASA.
Gibutyag ni Baltazar Tribunalo, Jr., Provincial Disaster Risk Reduction Management Office (PDRRMO) Chief nga nalakip sa ilang gi-monitor pag-ayo ang mga lugar nga duol kaayo sa mga kasapa-an lakip sa mga kalungsuran sa Malabuyoc, Argao, San Fernando, Asturias, Pinamungajan ug Tuburan. Matud ni Tribunalo nga ang maong mga lugar posible nga maigo sa mga landslides ug mga pagbaha.
Samtang, ang Mines and Geo-Sciences Bureau (MGB-7) mipasidaan sa mga residente sa Barangay Tina-an, Naga City, Cebu sa posibleng pagdahili sa yuta epekto sa mga pag-uwan-uwan. Niadtong miaging Septiyembre 20, 2018, mokabat sa 78 ka mga tawo ang nakalas gumikan sa landslide sa Barangay Tina-an sa Naga City.
Samtang, gikanselar sa mga Local Government Units (LGUs) lakip sa Lapu-lapu City, Talisay City ug Mandaue City ang mga klase karong adlawa alang sa pre-school ug sa senior high school. Si Mandaue City Mayor Luigi Quisumbing mimando sa pag-kanselar sa klase tanang public schools sugod kagahapon ug karong adlwa.