Gisugdan sa Zamboanga del Norte Police Provincial Office o ZNPPO ang selebrasyon sa ika-31 nga Police Community Relations Month pinaagi sa kick-off ceremony nga gipahigayon sa Conference Room sa Camp Lt. Deogracias G. Hamac sa Barangay Sicayab, Dipolog City niadtong Hulyo 8.
Gitambongan ang kalihokan sa mga opisyal ug kapulisan sa ZNPPO, mga force multiplier, barangay tanod, partner agencies ug mga sakop sa media. Nahimong guest speaker si Dr. Rey D. Acis, founder sa ORACIS Group, kinsa nagdasig sa mga boluntaryo nga mahimong tulay tali sa gobyerno ug sa katawhan, ilabina sa mga komunidad nga nagkinahanglan og dugang serbisyo.
Gihisgutan usab sa programa ang pagpalapad sa volunteer network, scholarship program sa ORACIS Group, Micro Financial Sustainable Program, ug ang YAKAP Program sa PhilHealth. Gipahigayon usab ang lecture bahin sa PNP Citizen’s Arrest, samtang gitanyag ang libreng legal assistance, notarial services, blood sugar testing, blood pressure monitoring ug medical check-up.
Sumala sa ZNPPO, ang Police Community Relations Month nagtumong sa pagpalig-on sa panagtambayayong tali sa kapulisan ug komunidad aron mas mapauswag ang kalinaw, kahapsay ug paghatag og serbisyo sa publiko.(JENIFFER JR. DELICA)
Source: Zamboanga del Norte Provincial News Network