Gipalig-on sa Zamboanga del Norte Medical Center ang pagpangandam alang sa 292nd Tzu Chi Philippines Medical Mission sa Agosto 6 hangtod 8, diin mokabat na sa 3,000 ka mga pasyente ang nakapalista alang sa libreng serbisyo medikal.
Padayon ang pagdawat sa mga pasyente ug medikal nga konsultasyon sa ZNMC aron mahibal-an ang ilang kahimtang sa panglawas sa dili pa ang medical mission. Sumala sa Zamboanga del Norte Medical Team, gilauman nga moabot sa 6,000 ka mga pasyente ang mapahimuslan sa maong kalihokan.
Ang mga operasyon ipahigayon sa Zamboanga del Norte Medical Center, samtang ang ubang serbisyo medikal himuon sa Zamboanga del Norte Cultural Center. Gawas niini, nagpadayon usab ang libreng konsultasyon alang sa neuro ug spine, ingon man sa mga pasyenteng adunay balatian sa kasingkasing, baga, ug nagkinahanglan og AV fistula alang sa dialysis.
Giawhag ang mga pasyente nga magpailalom sa gikinahanglang laboratory examinations aron matabangan ang mga espesyalistang doktor sa hustong pagdayagnos ug paghatag sa angayng tambal atol sa maong medical mission.(JENIFFER JR. DELICA)
Source: Zamboanga del Norte Provincial News Network