DIPOLOG CITY — Malampusong gidala sa Zamboanga del Norte Medical Center (ZNMC) Medical Team ang tulo ka pediatric patients ngadto sa Pagadian City alang sa ilang nakatakdang Pedia 2D ECHO examination isip kabahin sa padayong pag-atiman ug suporta sa ilang kahimtang sa panglawas.
Gipangulohan ni Nurse Alyssa Karylle Z. Reluya ug ambulance driver Reneboy B. It-it ang transportasyon kang Reden George Benosa nga adunay Congenital Heart Disease (Tetralogy of Fallot), Archie Manggi nga adunay posible nga Thalassemia, ug Mikko Ferraren nga gi-diagnose og Bacterial Pericarditis. Ang mga pasyente gipadala sa klinika ni Dr. Mary Antonette Lozada sa Pagadian City alang sa dugang nga espesyalistang eksaminasyon.
Dako ang pasalamat sa mga pamilya sa mga pasyente kang Governor Darel Dexter Uy tungod sa padayong suporta sa sektor sa panglawas, ilabina sa paghatag og transportasyon ug tabang alang sa mga nanginahanglang pasyente gikan sa lalawigan.
Gipasalamatan usab nila si ZNMC Medical Team Head Herdina Gallegos ug ZNMC Hospital Administrator Dra. Esmeralda Nadela tungod sa ilang pag-atiman ug koordinasyon aron masiguro nga hapsay ug luwas ang biyahe sa mga pasyente ngadto sa ilang gikinahanglang pasilidad medikal.
Nagpadayon ang ZNMC sa paghatag og serbisyo nga nagpalawom sa pag-atiman sa mga pasyente, ilabina kadtong nanginahanglan og espesyal nga medikal nga pagtagad gawas sa lalawigan.(JENIFFER JR. DELICA)
Source: Zamboanga del Norte Medical Team