Gumikan sa ka kaasgut, kaaktibo ug alyansa sa kabatan-onan dinhi sa Zamboanga del Norte, maoy hinungdan nga lakip kini napili sa UNICEF isip usa sa lima ka programme sites sa tibuok nasud alang sa Learning to Earning Pathways (LEaP) Programme. Kini ang gipamahayag ni Mr. Tope Kliatchko sa UNICEF Philippines sa Press Conference atul sa Kick-Off Activity sa maong programa nga gipahigayon sulod sa Plenary Hall, Zamboanga del Norte Convention and Exhibition Center, Estaka ning dakbayan sa Dipolog, Abril 7.
Niini, gipahalipayan Mr.Kliatchko ang mga kabatan-onan sa Zamboanga del Norte sa pagsuporta sa maong programa. Ingon man, kinahanglan nila ang modelo alang sa pagpalambo sa ilang kinabuhi. Samtang gikalipay ni Provincial Youth Development Officer Charles Anthony Rotoni nga usa ang probinsya nga napili sa lima ka Programme Sites sa tibuok nasud. Dugang niya dili lang karon lima kun dili madungagab pa kini nga mga complementary programs para sa youth development ang ma-implementar yungod kay usa sa priority agenda sa administrasyon ang skills development program para sa mga kabatan-onan. Kini dakong garbo sa Zamboanga del Norte nga makapahimulos sa nagkalain-laing kurso nga gitanyag ilawum sa LEaP Programme sulod sa tulo ka tuig.
Samtang si Mr. Al Vincent Recentes sa DICT ang mipasalig usab nga molugway sa Digital Skills sama sa basic computer, online safety, digital content creation ug paunsa nga mamahimong responsableng digital citizen. Si Ms Diana Racquel Acaylar, ang Zamboanga del Norte Area Coordinator sa LEaP Programme ang nagkanayon usab nga aduna nay 27 ka youth organizations ang miduso na sa ilang proposal alang sa maong programa.
Samtang si Sangguniang Kabataan President Leander James Dangcalan sa Zamboanga del Norte hugtanong misuporta sa maong programa aron usab makapahimulos niini ang out-of-school youths sa probinsya. Si Keenyji Karbasi sa Youth Serving Organization ang mipadayag usab sa iyang suporta alang sa kaayuhan sa mga kabatan-onan dinhi sa probinsya. Nasayran nga ang laing upat ka lugar nga napili isip LEaP! Programme Sites mao ang Angeles City-Pampanga, Northern Samar, Cagayan de Oro City ug Zamboanga City.(Angelica T. Obina)
Source: Provincial Information Center Zamboanga del Norte (PIC)- Sheng Bala