Dipolog City – Gipasidan-an sa Zamboanga del Norte Electric Cooperative (ZANECO) ang tanang myembro og konsomante nga gilauman ang pagsaka sa bayranan sa kuryente karong Hulyo 2026, diin ang estimated residential power rate mahimong moabot sa ₱14.81 matag kilowatt-hour (kWh).
Sumala sa ZANECO, ang pagsaka sa power rate nag-una tungod sa dako nga pagsaka sa generation cost, nga giimpluwensiyahan sa mas mahal nga presyo sa kuryente sa Wholesale Electricity Spot Market (WESM).
Gipatin-aw sa kooperatiba nga ang generation charge usa lamang ka pass-through charge, nga nagpasabot nga ang kantidad niini diretsong ibayad sa mga power supplier ug dili kini kita o ginansya sa ZANECO.
Base sa ilang gipagawas nga datos, ang generation rate misaka gikan sa ₱7.6883/kWh sa Hunyo ngadto sa ₱8.7675/kWh sa Hulyo, samtang ang WESM rate misaka usab gikan sa ₱9.5859/kWh ngadto sa ₱13.5439/kWh usa ka dakong hinungdan sa pagtaas sa kinatibuk-ang singil sa kuryente.
Tungod niini, gidasig sa ZANECO ang publiko nga maghigpit nga desiplina sa paggamit sa kuryente pinaagi sa pagpalong sa mga suga ug appliances nga wala gamita, paggamit og LED bulbs ug energy efficient nga kagamitan, ug pag-unplug sa mga appliances nga wala naggamit aron malikayan ang dili kinahanglang konsumo hinungdan sa pagsaka sa balayrunon sa kuryente.
Bisan pa sa gilaumang pagsaka sa bayranan, gipasalig sa ZANECO nga magpadayon kini sa paghatag og lig-on, kasaligan, ug episyenteng serbisyo sa kuryente alang sa tanang member-consumers.
Samtang nagpadayon ang pagsaka sa presyo sa suplay sa kuryente sa merkado, gilauman nga mas mabug-at ang epekto niini sa bulsa sa mga konsumidor, hinungdan nga mas gikinahanglan ang maampingong ug responsableng paggamit sa elektrisidad sa matag panimalay.(ANGELICA OBINA)