Nakakumpiskar ang Police Regional Office 7 (PRO7) og mga smuggled nga sigarilyo ug uban pang produktong tabako nga nagkantidad og ₱4.4 milyon atol sa 64 ka anti-smuggling operations nga gihimo sa tibuok Central Visayas gikan Abril 15 hangtod Hulyo 14, 2026.
Tungod sa maong operasyon, walo ka indibidwal usab ang nadakpan tungod sa ilang pag-apil sa ilegal nga pagdala, pagtipig ug pag-apod-apod sa mga smuggled nga produktong tabako. Matod sa PRO7, padayon nilang gipakusog ang kampanya batok sa mga krimen nga makadaot sa ekonomiya sa nasod.
Gipasabot sa PRO7 nga ang pagpalusot og sigarilyo makapakunhod sa koleksiyon sa buhis sa gobyerno nga gigamit alang sa mga serbisyong publiko sama sa panglawas, edukasyon, imprastraktura ug kalinaw. Makaapekto usab kini sa mga lehitimong negosyo ug makahatag og kita sa mga grupo nga nagpaluyo sa ilegal nga negosyo.
Nagpadayon usab ang PNP sa pakigtambayayong sa Bureau of Customs, Bureau of Internal Revenue, mga lokal nga panggamhanan ug uban pang ahensya aron mapugngan ang pagpalusot ug madakpan ang mga responsable.
Matod ni PRO7 Regional Director PBGen. Arnold E. Abad, wala nay lugar sa Central Visayas ang pagpayujot og sigarilyo. Miingon siya nga ilang dugangan ang mga operasyon ug koordinasyon sa ubang ahensya aron mailhan, madakpan ug mapasakaan og kaso ang tanang nalambigit sa ilegal nga negosyo sa smuggled tobacco products.
Gipasalig sa PRO7 nga magpadayon sila sa pagpalig-on sa ilang intelligence ug enforcement operations aron mapanalipdan ang ekonomiya sa nasod ug masiguro ang pagsunod sa balaod.
I via Renante Socia Lada