Puno sa pagdayeg ug pagmaya gikan sa mga opisyales sa Zamboanga del Norte ug sa Department of Education (DepEd) ang maanindot nga Opening Ceremony sa Zamboanga Peninsula Regional Athletic Association (ZPRAA) Meet nga gipahigayon sa Julian Soriano Memorial Sports Complex, Siocon, ning probinsya sa Zamboanga del Norte.
Kini ang nahimong reaksiyon sa maong mga opisyales sa ilang nakita nga grabe ang mga pasundayag nga gipakita sa mga perfomers alang na sa Opening Ceremony.
Si Dr. Ruth Fuentes, ang Regional Director sa Department of Education IX ang nagkanayon nga ang pag-host sa ZPRAA 2025 dinhi sa lungsod sa Siocon, usa ka damgo nga nahatagan ug katumanan. Dugang ni Dr. Fuentes nga usa ka tuig ang nakalabay sa dihang ilang gisubay ang maong venue, wala pa sila kahibalo kung unsaon pag-usob niini. Apan wala nila damha karon ang dakong kausaban niini ug sa makapahinganghang Opening Salvo ug lisud na kini hitupngan sa sunod nga mag-host sa ZPRAA gumikan sa ilang dakong pagpangandam aron lamang mausob ang lungsod sa Siocon.
Gidayeg usab ni Dr. Fuentes ang kapin 2,000 ka mga bata sa lungsod sa Siocon sa maayong performance sa field demonstration. Dugang pa niya nga kini nagpakita nga mamahimong magkahiusa kung ang tanan adunay disiplina.
Walay puas ang pagpasalamat ni Dr. Fuentes ngadto ni Mayor Ceasar Soriano sa dili basta-basta pag-host sa ZPRAA Meet 2025. Dugang ni Dr. Fuentes nga ang gipakita ni Mayor Soriano dili lamang pang regional, national meet kondili pang international pa. (Angelica T. Obina)
(Source: Sheng Bala)