Dipolog: Zamboanga del Norte mihangyo sa Sangguniang Panlalawigan nga ipailawum sa State of Calamity

0
2

Girekomendar ug gihangyo karon sa Provincial Disaster Risk Reduction and Management Council (PDRRMC) ngadto sa Sangguniang Panlalawigan nga ipailawum sa State Of Calamity ang lalawigan sa Zamboanga del Norte human kini nakasinati sa dakong baha dala sa Low Pressure Area (LPA) ug shearline kaniadtong Enero 11-12 niining tuiga.

Kini  pinaagi sa giduso nga resolusyon ni DILG Provincial Director Oliver B. Ombos, usa sa miyembro sa maong konseho atul sa Emergency Meeting sa PDRRMC nga gipanguluhan ni Provincial Administrator Atty Dug Christoper Mah nga nagrepresentar ni Governor Rosalina “Nanay Nene” Jalosjos kaniadtong Enero 19 niining tuiga nga gipahigayon sa Hall 3, PGO Conference Room.

Ang resolusyon ni Ombos giaprobahan gilayon sa maong konseho ug iduso kini ngadto sa Sangguniang Panlalawigan.

Base sa initial report sa PDRRMO Emergency Operation Center (EOC) pinaagi ni Engr. Dennis C. Tenorio nga adunay walo ka indibidwal ang hinanaling nakabsan sa kinabuhi ug duha ang samaran.

Samtang adunay  17 ka mga lungsod ug duha ka dakbayan sa Dipolog ug Dapitan ang apektado sa maong dakong pagbaha ug pagdahili sa yuta.

Usab, adunay 4 ka mga lungsod ang mideklarar na kini  nga State Of Calamity nga mao ang Katipunan, Sibuco, Sirawai ug Siocon.

Niini, adunay 37,174 ka pamilya ug anaa sa  160,159 ka indibidwal ang apektado sa maong dakong baha nga nasinati dinhi sa probinsya.

Dugang sa maong datus sa PDRRMO EOC nga ang tibuok lalawigan sa Zamboanga del Norte, mitala nga adunay danyos nga  Php31,872,745.81, sa agrikultura, sa pangisdaan Php9,938,510.00, sa livestock and poultry Php2,919,620.00, imprastraktura Php69,500,000.00 ug ang mga panimalay nga mga nadaot mibalor sa Php46,920,000.00.

Samtang sa kabahin usab sa nangadaut nga mga tulunghaan sa Zamboanga del Nort Schools Division, si Eunice Duran Janolino, Project Development Officer II Division DRRM Coordinator sa maong buhatan ang mitaho  sa maong panagtigum nga  mokabat sa  P144,977,209.18 kantidad sa nahimong danyos niini.

Daghanang mga lawak-tulunghaan, armchairs, desktop, mga lamisa, libro ug uban pa ang nangadaot ug nangaguba tungod sa paglanab sa tubig sulod sa tulunghaan.

(Source: Provincial Information Center Zanorte Facebook page)

LEAVE A REPLY

Please enter your comment!
Please enter your name here