Nakuha sa Zamboanga City ang ikatulong sunod nilang overall championship sa ika-22 nga ZPRAA Meet human mangibabaw sa medal tally sa kompetisyon nga gipahigayon gikan Abril 6 hangtod 11.
Nasiguro ang ilang kadaugan bisan wala pa mahuman ang tanang events, diin nakatigom sila og 148 ka bulawan, 96 ka pilak, ug 92 ka bronse nga medalya, nga nagpakita sa lig-on nilang preparasyon ug programa sa isports.
Misunod sa ikaduhang pwesto ang ZANDIDAA delegation nga adunay pinakadaghang kinatibuk-ang medalya apan napildi sa overall ranking tungod sa mas gamay nga gold medals, samtang mikompleto sa top three ang Zamboanga del Sur.
Ang maong regional meet nagtapok sa liboan ka atleta gikan sa tibuok rehiyon ug nagsilbi usab nga pagpili sa mga posibleng mo-representar sa Palarong Pambansa, samtang gipakita sa Isabela City ang malampusong paghost sa kalihokan.(JENNIFER JR. DELICA)
Source: Zamboanga del Norte Provincial News Network