Giturn-over ni Sgt. Junelo P. Bongcawel sa 97th Infantry Battalion ngadto sa Community Environment and Natural Resources Office (CENRO)-Liloy ang usa ka hamtong nga babayeng Writhed Hornbill (Rhabdotorrhinus leucocephalus) human niya kining maluwas sa Barangay Batayan, Kalawit niadtong Hunyo 22.
Matud ni Bongcawel, iyang nakit-an ang langgam nga huyang ang kahimtang ug gilayon kining giatiman sa iyang puluy-anan samtang nangayo siya og tabang sa mga awtoridad.
Gitambongan ang turnover ni Barangay Kagawad Reymond P. Dacumos sa Barangay Batayan, samtang midawat sa langgam sila OIC-CENRO Forester Maribel G. Acama ug DMO III Hector F. Lusaya, kauban ang mga kawani sa Enforcement and Monitoring Section ug Protected Area Management and Biodiversity Conservation Unit.
Human sa turnover, gisusi sa CENRO-Liloy ang kahimtang sa hornbill ug gibutang kini sa wildlife holding facility alang sa dugang nga pag-atiman. Bisan og maayong pisikal ang kondisyon niini, namatikdan nga adunay timailhan sa pagka-anad sa pag-atiman sa tawo o domestication, busa ipaubos pa kini sa rehabilitasyon sa dili pa ikonsiderar nga ibalik sa iyang natural nga puy-anan.
Ang Writhed Hornbill, nga nailhan usab isip Mindanao Wrinkled Hornbill, gilista isip Vulnerable ubos sa DENR Administrative Order No. 2019-09.
Sumala sa DENR, ang malampusong pagluwas ug pagtugyan sa maong langgam nagpakita sa importansya sa kooperasyon sa komunidad sa pagpanalipod sa wildlife ug sa pagpatuman sa Republic Act No. 9147 o Wildlife Resources Conservation and Protection Act.(IKEN B. GULLEM)
Source: DENR Zamboanga Peninsula