Isip pagpangandam sa umaabot nga land survey ubos sa Support to Parcelization of Lands for Individual Titling (SPLIT) project, ang Department of Agrarian Reform (DAR) Zamboanga del Norte ang usa ka pulong-pulong sa Barangay Lopero, Jose Dalman, nga nagtumong sa mas klaro ug patas nga pagbahin sa yuta alang sa mga mag-uuma.
Ang kalihokan gipangulohan ni Municipal Agrarian Reform Program Officer (MARPO) Angela L. Patac uban sa MARPO staff ug DAR Survey Team. Gitambongan kini sa mga landowner ug agrarian reform beneficiaries aron masabtan ang proseso sa survey ug ang papel niini sa hustong pag-ila sa mga utlanan sa yuta.
Atol sa pulong-pulong, gihatagan og detalye ang mga partisipante bahin sa pamaagi sa survey, lakip ang importansya sa sakto nga land delineation aron malikayan ang mga panagbangi ug mapadali ang pagproseso sa indibidwal nga titulo sa yuta.
Human sa konsultasyon, dayon gisugdan sa SPLIT Survey Team ang aktuwal nga pagsukod ug pag-subdivide sa yuta. Matod pa sa DAR, ang maong lakang importante aron masiguro ang hapsay nga dokumentasyon ug hustong pagpanag-iya sa yutang agraryan.(IKEN B. GULLEM)
Source: DAR ZAMBONORTE