Gipunting sa Bureau of Fire Protection (BFP) Zamboanga del Norte ang pagpalig-on sa inter-agency coordination ug modernisasyon sa mga operasyon atol sa New Year Call niini ngadto kang Gov. Darel Dexter T. Uy, kaniadtong Enero 22, 2026 sa Provincial Capitol sa Barangay Estaka.
Gipangulohan ni Provincial Fire Marshal FSUPT Richard C. Timosa ang delegasyon sa BFP nga miduaw sa Governor’s Office, diin gihisgutan ang mga prayoridad nga lakip ang transparency, accountability, ug mas episyenteng incident reporting pinaagi sa paggamit sa modernong teknolohiya.
Usa usab sa gipresentar sa ahensya ang plano sa pagtukod og bag-ong two-storey nga building alang sa Provincial Fire Marshal’s Office aron masuportahan ang nagkadagkong administratibo ug operational nga panginahanglan sa probinsya.
Mipadayag si Gobernador Uy sa iyang suporta sa mga inisyatiba sa BFP ug gipasiugda ang kamahinungdanon sa lig-on nga kooperasyon tali sa mga ahensya sa gobyerno isip yawe sa kaluwasan ug kaayohan sa katawhan sa Zamboanga del Norte.(IKEN B. GULLEM)
Source: Zamboanga del Norte Provincial News Network