Angol ang tulo ka mga biktima nga gikatahong gilabayan ug Granada ang usa ka panimalay partikularmente sa Brgy. San Jose, Kalawit, Zamboanga del Norte kaniadtong Marso 3 2025.
Ang mga biktima nailhan sa pangalan nga sila si Renel Elmenzo Labina, 38 anyos, Honeylete Pagador Labina, 33 anyos kasamtangang nanimuyo sa Brgy. Farmington, Tampilisan, Zamboanga del Norte, apil ang tag-iya sa usa ka balay nga si Arnold Yu Lubaton, 69 anyos ang panuigon.
Matud pa sa pasiunang imbistigasyon sa kapolisan sa Kalawit MPS sa maong adlaw bag-o lang nahidangat sa iyang pinuy anan ang biktima nga si Lubaton gikan sa Barangay Hall samtang ang duha ka mga biktima ang anaa sa sala kasamtangang gapahulay ug sa dihang adunay usa ka wala mailhing suspetsado ang mipahigayon ug paglabay sa hand grenade sa mismong pultahan sa panimalay niini.
Hinungdan sa pagboto sa Granada, ang mga biktima gidala gidayon sa Liloy Integrated Hospital tungod sa mga naangkon nga samad sa lainlaing parte sa kalawasan ang tulo.
Sa pagkakaron ang mga biktimang naangol ang anaa na sa luwas nga kahimtang ug padayon pang giatiman ang kondisyon sa mga doctors.
Samtang ang suspetsado gikatahong nakasibat dayun paingon sa Tampilisan pagkahuman sa gihimo niining krimen.
Ang mga Kalawit PNP ang padayon pa sa gihapon sa halapad nga imbestigasyon para mahibaw-an kung unsay motibo ug kinsa ang gapaluyo niini ingon man pag-ila sa suspetsado.(Angelica Obina)
Source: ZNPPO