Boluntaryong gi-turn-over ang duha ka nailhang species nga mao Juvenile Brahminy Kite (Haliastur indus) ug Philippine Long-tailed Macaque (Macaca fascicularis philippensis)ngadto sa mga kawani sa CENRO Liloy didto sa Brgy.Fatima Salug, Zamboanga del Norte, niadtong Mayo 9,2026.
Ang maong pagtugyan sa mga nasangpit nga mga mananap gihimo ubos sa mga technical personnel sa CENRO Liloy, pinangulohan sa Community Environment and Natural Resources Officer,kinsa mitubag gilayon ug nakigkoordinar ngadto sa mga hingtungdan nga awtoridad ug kauban nga mga stakeholder aron mapadali ang luwas nga pagkuha ug husto nga pagdumala sa mga species sa wildlife.
Ang pagturn-over napatoman pinaagi sa usa ka retrieval operation ug hiniusang paningkamot sa Enforcement and Monitoring Section pinangulohan ni FII Neil A. Aquino, uban sa FT I Ma. Isabelle M. Etulle, FR Hardie Hamoy, FR Jerselle G. Rafols, FPO Jinggoy Garcia, PAMBCU Staff June Marklee Bulay-Bulay, ug AA VI Ashely Ann L. Tagalicud.
Lakip usab sa mitabang sa maong kalihokan mao sila si Hon. Estelito Tomalites sa Barangay Local Government Unit sa Fatima, Salug, Zamboanga del Norte ug Mr. Ducal Barangay IPMR sa Tapalan, Salug, Zamboanga del Norte.
Nasayran base sa nakuhang impormasyon matod pa, gikatahong naluwas ang menor de edad nga Brahminy Kite human nahulog ang salag niini kilid sa sapa sa maong dapit ug gibana-bana nga duha (2) ka buwan nga giatiman sa hingtungdan nga si Mr. Rogelio Gumasab kinsa ang mi-alima sa maong mananap.
Samtang, sa samang higayon gi turn-over usab sa nagpakabana nga lungsuranon nga si Ms. Anilyn T. Gumasab kinsa mao ang mi-alima sa nailhang Philippine Long-tailed Macaque.
Tungod niini, kinasing kasing nga mipadayag sa iyang pagpasalamat si Forester Aquino ngadto sa komunidad sa ilang kooperasyon, aktibong pagtubag, ug suporta sa pagpanalipod ug pagkonserba sa wildlife resources ug mihatag ug oryentasyon kalabot sa pagdili sa dili awtorisado nga pagpanag-iya sa mga espisye sa wildlife ug ang mulapas niini adunay katugbang nga silot sa balaod.
Giawhag niini ang publiko nga mo report gilayon ngadto sa pinakaduol nga Opisina sa DENR Office, LGU, o PNP kung adunay mga wildlife sightings ug wildlife-related concerns aron sa ingon niini,ma konserba ang natural nga puy-anan sa wildlife ug ma proteksyonan kini sa unsa kapilegrohan nga ilang maangkon sa kinaiyahan.(MEDALYN U. BORJA)
Source: DENRZamPen