Giduso karon sa lokal nga kagamhanan sa Dapitan ang pagpasa sa usa ka landmark ordinance nga magpanalipod sa Philippine tarsier human sa bag-ong sighting niini sa Barangay Hilltop.
Ubos sa pagpanguna ni Evelyn T. Uy, kauban ang Sanggunian, ang ordinansa nagtinguha nga maghimo og lig-on ug klarong balaod nga moprotekta sa Philippine tarsier o “Basing” sulod sa hurisdiksyon sa siyudad.
Sumala kang Atty. Bryne Angelo Brillantes, hapit na kini sa final hearing, nga nagpasabot nga andam na alang sa posibleng pagpasa sa konseho.
Kini nga proposed ordinance naglatid sa hugot nga pagdili sa pagpangayam, ilegal nga pagbaligya, pagguba sa habitat, ug bisan unsang kalihokan nga makasamok sa tarsier sama sa kusog nga kasaba ug flash photography.
Gipasiugda usab niini ang proteksyon sa natural nga puy-anan sa tarsier ug ang pagkoordinar sa Department of Environment and Natural Resources aron masiguro ang long-term conservation sa species.
Giisip ang maong lakang nga usa ka hinungdanong milestone sa environmental protection sa Dapitan, nga nagpalig-on sa paningkamot sa siyudad sa pagpreserbar sa endemic wildlife sa nasud.(IKEN B. GULLEM)
Source: City Government of Dapitan