Napuno sa kasadya, kalingawan, ug pasundayag ang pagsaulog sa ika 27th P’gsalabuk Festival dinhi sa dakbayan sa Dipolog kaniadtong Mayo 22, 2026, diin ang ikapitong adlaw human sa pagbukas kaniadtong Mayo 15, nga adunay temang “Unity amidst Diversity.”
Usa sa mga highlights nga nakapahinam sa mga katawhan mao ang Street Dancing ug Search for P’gsalabuk Queen diin 6 ka contingents ang nagpakitang gilas sa ilang tagsa tagsa ka mga talento, gilangkuban kini gikan sa Brgy. Turno, Brgy. Sta. Isabel, Brgy. Polanco, Brgy. Dicayas, Brgy. Olingan, ug Municipality of Liloy.
Mipuno sa kadalanan ang kolorful nga mga kasuotan sa TRI-PEOPLE sa Dipolog—ang Lumad, Bangsamoro ug Early Settlers, uban sa kusog nga tambol ug mga pasundayag nga naghulagway sa dato nga kasaysayan ug panulondon sa katawhan.
Misalmot sa maong selebrasyon si City Mayor Roberto Y. Uy, City Vice Mayor Senen O. Angeles, ug 2nd Congressional District Representative Hon. Airene G. Labadlabad. Aktibo usab miapil ang nagkadaiyang mananayaw gikan sa nagkadaiyang barangay ug lungsod, mga organisasyon, kawani ug opisyal sa gobyerno sama sa Office of the City Assessor, Sangguniang Panlungsod, Livelihood Skills Development Enhancement Center (LDEC), City Engineering Office ug uban pa nga nagpakita ug suporta sa kalihokan isip simbolo sa panaghiusa.
Kabahin usab sa kasaulogan ang Search for P’gsalabuk Festival Queen, nga nagrepresentar sa katahum, grasya ug espiritu sa P’gsalabuk Festival, diin sulod sa Top 3 ang brgy. Dicayas nga nakuha ang 2nd runner up, 1st runner up ang brgy. Olingan, samtang gihirang isip P’gsalabuk Festival Grand champion ang brgy. Sta. Isabel.
Samtang, ang maong parade gisugdan alas 3:30 sa hapon gikan sa Plaza Magsaysay ug gitapos didto sa Dipolog Sunset Boulevard diin gipahigayon ang Search for P’gsalabuk Queen alang sa dance show down.
News and photo by: IKEN B. GULLEM