Gipahigayon og hapsay ang unang adlaw sa KALASAG-Zamboanga del Norte Inter-Agency Territorial Defense Operations Exercise 02-2026 niadtong Agosto 13, diin gisulayan ang koordinasyon ug interoperability sa nagkalain-laing ahensya alang sa depensa ug kaluwasan sa komunidad.
Gipangunahan sa mga tropa sa Philippine Army, Philippine Coast Guard, Maritime Police ug ubang uniformed services ang nagkadaiyang simulation exercises, lakip ang coastal defense sa Dipolog City Boulevard, airborne operations sa Barangay Sinaman gamit ang Black Hawk helicopter, ug mass casualty evacuation. Gisaksihan usab ni Governor Darel Dexter Uy ang coastal defense exercise.
Gipakita sa mga responders ang mga pamaagi sa emergency medical response ug pagpangandam sa mga samaran, samtang gipakita usab sa Bureau of Fire Protection ang hustong pamaagi sa pagpalong ug pagkontrol sa sunog. Sumala ni LTC Jessie Bergonia, Commanding Officer sa 97th Infantry Battalion, kalma lamang ang mga lumolupyo nga nakasaksi sa coastal defense tungod sa ilang daan nga pagpahibalo bahin sa maong kalihukan.
Nagpasalamat si LTC Bergonia sa mga ahensyang mitambong ug misuporta sa exercise, lakip ang Philippine National Police, Philippine Coast Guard, Bureau of Fire Protection, Philippine Air Force ug nagkalain-laing units sa Philippine Army. Sa Agosto 18, ipahigayon ang Non-Combatant Evacuation Exercise, samtang sa Agosto 20 himuon ang Final Execution of Urban Clearing and Assault Drills ug ang closing ceremony sa exercise.(JENIFFER JR.DELICA)
Source: Zamboanga del Norte Provincial News Network