Gibuksan na ang Turno Fire Sub-Station sa Barangay Turno, Dipolog City, human sa opisyal nga activation ug pagpirma sa Memorandum of Understanding nga gipahigayon sa Bureau of Fire Protection Region IX ug sa Office of the Provincial Fire Marshal sa Zamboanga del Norte.
Gitambongan ang kalihokan ni Acting Regional Director Fire Senior Superintendent Kadil T. Acalul, Acting Provincial Fire Marshal Fire Superintendent Richard C. Timosa, ug Dipolog City Vice Mayor Atty. Senen O. Angeles nga nirepresentar kang Mayor Roberto Y. Uy. Mitambong usab ang mga opisyal sa Barangay Turno, mga personnel sa BFP, partner agencies, ug mga sakop sa komunidad.
Kabahin sa programa ang ribbon-cutting ceremony, pagbasa sa Regional Order alang sa activation sa sub-station, presentasyon sa mga personnel, pagpirma sa Deed of Usufruct, ug mga mensahe gikan sa mga opisyal nga mitambong.
Gilauman nga ang Turno Fire Sub-Station makatabang sa mas paspas nga pagresponde sa sunog ug uban pang emerhensiya sa Dipolog City, samtang gipalig-on usab ang panagtambayayong tali sa Bureau of Fire Protection ug sa lokal nga panggamhanan aron mapauswag ang serbisyo alang sa katawhan.(JENIFFER JR. DELICA)
Source: BFP R9 Dipolog City Fire Station