Gipasidunggan sa City Government of Dapitan ang mga nag-unang digital content creators sa unang Kinabayo Creatives Fiesta 2026 Content Creators Competition atol sa awarding ceremony nga gipahigayon sa City Administrator’s Office niadtong Agosto 3.
Midaog isip Grand Champion si Kalokal PH, nga nakadawat og ₱20,000 cash prize. Gisundan kini ni Pitik ni Kons isip second place nga nakadawat og ₱15,000, samtang nakuha ni Miss Katabian ang third place ug ₱10,000. Samtang, si Kurt Proceso ang mipahimutang sa fourth place ug nakadawat og ₱5,000.
Personal nga gitunol ang mga awards ug cash incentives nila OIC City Administrator Danilo S. Areños Jr. ug OIC City Tourism Officer Jervie Padrones, nga mipasalamat sa mga partisipante sa ilang pagpakita sa kultura, tradisyon, ug mga kalihokan sa Kinabayo Festival pinaagi sa digital content.
Ang kompetisyon nagtawag sa mga content creators sa paghimo og mga bidyo ug online content nga nagpasundayag sa mga nagkadaiyang kalihokan sa Kinabayo Festival 2026 nga gipahigayon gikan Hulyo 10 hangtod 25.
kini nga maong inisyatiba kabahin sa paningkamot sa pagpalambo sa turismo ug pagpasundayag sa kultura sa siyudad pinaagi sa digital storytelling.(IKEN B. GULLEM)
Source: Dapitan City Government