Nadakpan ang giilang Top 1 Most Wanted Person (Municipal Level) atol sa gipahigayon Intel-Driven Joint Law Enforcement Operation sa Tracker Team sa Sirawai Municipal Police Station (MPS) didto sa Barangay Sirawai, Zamboanga del Norte niadtong nakalabay’ng adlaw.
Ang dinakpan usa ka 22 anyos nga lalaki, walay trabaho ug residente sa nahisgutang lugar, kinsa gisikop tungod sa kasong nga may kalabutan sa paglapas sa R.A 9165 o Comprehensive Dangerous Drugs Act of 2002.
Ang operasyon gipangulohan sa Sirawai Municipal Police Station ubos sa pagpanguna ni PCPT Berjohn B. Tianok, Officer-in- Charge, uban ang suporta sa 905th Regional Mobile Force Batallion 9 (RMFB9).
Ang suspetsado nadakpan pinaagi sa warrant of arrest nga giiisyu sa RTC Branch 27, Siocon, Zamboanga del Norte.
Sumala sa kapulisan, ang malampusong operasyon nagpakita sa walay puas nga dedikasyon sa kapulisan aron mapaubsan ang presensya sa mga wanted person ug masiguro ang seguridad sa komunidad.
Ang PNP mipasalig nga magpadayon kini sa mas hugot nga operasyon ug kolaborasyon uban sa laing law enforcement agencies aron makab-ot ang tumong nga luwas ug malinawon nga lungsod.(Jumalisa Papa)
Source: SIRAWAI MPS