Gipangulohan sa mga personahe sa Katipunan Municipal Police Station (MPS) ubos sa liderato ni PCPT Rommel John B. Sabas, Officer-in-Charge, ang usa ka Information Dissemination didto sa Covered Court sa Barangay Seroan, Katipunan, Zamboanga del Norte niadtong Setyembre 6, 2025.
Ang kalihokan gipahigayon atol sa “Pasalamat Program” nga gipasiugdahan sa Lokal nga Kagamhanan sa Katipunan ubos sa pangulo ni Hon. Jose Michael Meiko A. Wong, Municipal Mayor, sa maong lungsod.
Lakip sa gihatag nga kasayuran mao ang mga isyu kabahin sa kalinaw ug kahusay, kaayohan sa komunidad, ug mga palisiya nga may kalabotan sa seguridad ug kaluwasan sa katawhan. Gilauman nga pinaagi sa maong aktibidad, mas mapalapdan pa ang partisipasyon sa mga residente ug mas masabtan nila ang ilang papel sa pagpalig-on sa kahusay ug kalinaw sa barangay.
Ang kapulisan mipasalig sa pagpadayon sa sama nga mga programa nga adunay tumong nga mapaligon ang kooperasyon tali sa kapulisan ug katawhan ug aron mapatuman ang luwas ug malinawon nga komunidad sa Katipunan.(Jumalisa Papa)
Source: KATIPUNAN MPS