Gitan-aw isip hinungdanong timailhan sa kahimtang sa kinaiyahan ang pagkakita sa usa ka tarsier sa kabukiran sa Barangay Hilltop niadtong Mayo 7, nga nagdasig karon sa lokal nga kagamhanan sa pagpahigayon og mas lapad nga wildlife monitoring ug habitat mapping.
Ang ihalas nga hayop, naila sa lokal nga tawag nga “Basing,” nakita sa usa ka residente sa Purok Basak samtang nagkuha og sugnod sa kakahoyan. Ang tarsier giila nga usa ka hamtong nga babaye nga sakop sa endangered species nga Philippine tarsier.
Human sa report, ang Local Government Unit (LGU) sa Dapitan City nagpadala og validation team nga gipangulohan sa City Legal Office Head Atty. Bryne Angelo Brillantes aron tukion ang eksaktong lugar ug posibleng natural habitat sa maong species.
Sumala sa LGU, ang site validation kabahin sa padayon nga paningkamot sa siyudad sa pag-ila ug pagpreserbar sa mga wildlife zones, ilabina sa mga upland area nga posibleng puy-anan sa mga protektadong ihalas nga hayop.
Gipasiugda usab nga ang maong insidente makatabang sa pagpalig-on sa environmental planning ug paghulma sa mas estriktong conservation measures aron mapanalipdan ang biodiversity sa kabukiran sa Dapitan.
Padayon ang koordinasyon sa LGU ug mga environmental stakeholders alang sa dugang pagmonitor ug pagpanalipod sa ekosistema sa lugar.(IKEN B. GULLEM)
Source: City Government of Dapitan