Dugang nga tabang pinansyal ang gitunol kaniadtong Hunyo 9 sa Kagamhanang Probinsyal sa Zamboanga del Norte ngadto sa pamilya sa usa ka overseas Filipino worker (OFW) nga namatay sa Lebanon niadtong Abril 15, 2026.
Gitunol ni Acting Provincial Administrator Charmie A. Yu ang maong ayuda ngadto sa inahan sa biktima samtang nagpaabot sa pag-abot sa patay’ng lawas sa iyang anak, nga gilauman nga mauli sa nasud human sa kapin duha ka bulan nga proseso sa repatriation.
Una nang mibisita sa panimalay sa biktima sa Barangay Olingan, Dipolog City ang mga opisyal sa Department of Migrant Workers (DMW) pinangulohan ni Undersecretary Bernard P. Olalia kauban ang mga opisyal sa probinsya aron hatagan og suporta ang naulilang pamilya. Gawas sa inisyal nga tabang gikan sa nasyonal nga gobyerno, giangkon sa kagamhanang probinsyal ang galastuhan sa lungon ug embalsamar samtang ang lokal nga panggamhanan sa Dipolog maoy mitabang sa lubnganan.
Mipahayag usab og pagpasalamat ang inahan sa biktima ngadto kang Gobernador Darel Dexter Uy ug sa mga ahensya sa gobyerno nga mitabang sa ilang pamilya atol sa lisod nga kahimtang. Sumala sa Provincial Social Welfare and Development Office (PSWDO), nagpadayon ang paningkamot sa probinsya sa paghatag og suporta sa mga pamilyang nanginahanglan ilabina panahon sa kasubo ug kalisod.(IKWN B. GULLEM)
Source: Zamboanga del Norte Provincial News Network