Nagpadayon ang paningkamot sa City Government of Dipolog sa pagpanalipod sa dagat human nila pag-release sa ikatulong batch sa pawikan hatchlings sa Dipolog Boulevard kaniadtong Disyembre 9, 2025. Gipagawas ngadto sa dagat ang 93 ka Olive Ridley hatchlings uban nila Mayor Roberto Y. Uy ug Vice Mayor Senen O. Angeles, nga nagsimbolo sa suporta sa siyudad sa pagpreserbar sa marine wildlife ug coastal ecosystems.
Mitambong usab ang mga konsehal nga sila Kenny Val U. Ong, Dr. Ryan Niel A. Asprer, Atty. Raul B. Barbaso Jr., Atty. Roseller “Matoy” L. Barinaga, Atty. Jonald Napigquit, Harrison T. Young, James Cyril Ruiz III, ug Irvin Banga, kauban si PENR Officer Cidur S. Julsadjiri, nga nagpakita sa kolaborasyon sa lain-laing sangay sa lokal nga gobyerno ug mga partner sa kalikopan.
Ang aktibidad dili lang simboliko, naglangkob usab kini ug maampingong pag-monitor sa baybayon aron maseguro ang luwas nga paglarga sa mga pawikan padulong sa dagat. Gipahimangnoan ang mga katawhan sa paglikay sa pagdisturbo sa nesting sites, pagpamubo sa basura, ug pagreport dayon kung makit-an ang mga pawikan o itlog aron matabangan sa husto ang ilang proteksyon.
Ang pag-release sa Dipolog Boulevard usa na sa serye sa mga kalihokan karong season, ug nagpahimangno ang LGU nga magpadayon ang surveillance ug community education aron mapugngan ang pagka-wasak sa habitat sa pawikan. Gipangayo usab sa mga opisyal ang suporta sa publiko pinaagi sa pag-apil sa mga coastal clean-ups ug pagsunod sa mga panudlo sa konserbasyon.(IKEN B. GULLEM)
Source: Dipolog City Government