Nakab-ot sa Rural Health Unit (RHU) sa Pres. Manuel A. Roxas ang internasyonal nga dungog human madawat ang research abstract ni Municipal Health Officer nga si Dr. Christian Ernest Atienza atol sa Joint International Tropical Medicine Meeting (JITMM) 2025 nga gipahigayon sa Bangkok, Thailand.
Ang maong research nga adunay titulo “Combined Tuberculosis–Paragonimiasis Surveillance in President Manuel A. Roxas, Zamboanga del Norte through a Local Government Unit–Led Approach” mipakita sa papel sa LGU-led interventions ug sa lig-on nga kooperasyon sa mga stakeholders sa paglaban batok sa sakit nga kasagarang makita sa munisipyo, ilabi na ang TB ug paragonimiasis.
Gitambongan ang JITMM sa daghang health professionals ug researchers gikan sa lain-laing nasod, nga naghatag higayon sa RHU Roxas nga maipakita ang ilang lokal nga inisyatibo sa internasyonal nga entablado.
Nagpasalamat ang LGU Roxas sa UP Neglected Tropical Diseases Study Group ubos ni Dr. Vicente Belizario Jr. ug sa DOH-CHD Region 9 pinangulohan ni Dr. Lenny Joy Johnson Rivera sa ilang padayon nga suporta, nga nakatabang sa paglambo sa programa ug nakahatag dalan sa pagdawat niini sa internasyonal.(IKEN B. GULLEM)
Source: Roxas Zambonorte