Gipahigayon niadtong Marso 16, 2023 didto sa hawanan sa konseho kalabot sa mitumaw nga isyu karon sa pipila ka tulunghaan kabahin sa nadiskubre nga “hazing activity” nga naglambigit sa atong mga tinun-an sa sekondarya.
Tinambongan sa mga kadagkoan gikan sa pipila ka mga tulunghaang sekondarya dinhi sa siyudad, Dipolog PNP, presidente sa Federation of Parent’s Teachers Association, Dipolog City Schools Division, mga personahe gikan sa City Social Welfare and Development ug ubang hingtungdang ahensiya, ilawom sa pag-preside ni konsehal Jonald Napigquit, hiniusang gihisgotang ang nasangpit nga isyu.
Sa committee hearing, mihimo sa pagsaysay si ZNNHS Annex – Turno campus Principal, Mrs. Virginia Tagab, kalabot sa insidente sa hazing nga ilang nabatyagan nga naglambigit sa pipila mga tinun-an gikan sa nahisgotang tulunghaan.
Sa padayong deliberasyon sa hearing dugang nasayran nga gawas sa hazing, aduna usa’y pipila ka mga isyu nga gituki sama sa pag-inom sa ilimnong makahubog ug sa pagpanigarilyo sa mga tinun-an, ingon usab sa pagkadiskubre nga ang pagtumaw sa mga “gangs” sa mga tulunghaan gumikan sa pag-inpluwensiya sa mga dili magtutungha o “outsider” sa tulunghaan.
Ning kasamtangan, ang buhatan sa City Social Welfare ning siyudad, nga gi-representahan ni Social Welfare Officer III, Patrick Jalapadan ang mibutyag usab nga aduna na sila’y nakuhang mga listahan sa pangalan sa mga mitumaw nga gangs nga gilangkoban sa mga menor de edad nga mga estudyante sa sekondarya.
Dugang pa ni Tagab nga ilang nang gihimo-an sa aksiyon kining maong suliran sa ilang lebel, pinaagi sa pagsuspendi sa mga magtutungha nga nalambigit sa hazing activity, uban sa pagpatawag sa mga ginikanan niini sa ilang buhatan.
Atol usab sa deliberasyon mi-apela si Assistant City Schools Division Superintendent, Lourma C. Poculan ngadto sa mga hingtungdang ahensiya sa kagamhanan sa paghimo sa kolektibong aksiyon aron sa pagsumpo ning maong suliran karon nga naglambigit sa mga tulunghaan dinhi sa siyudad.
(Source: Dipolog City Government Facebook page)