Pormal nang gipangandaman sa Probinsya sa Zamboanga del Norte ang pagselebrar sa “Saulog sa Bag-ong ZaNorte 2026,” diin ang State of the Province Address (SOPA) ni Governor Darel Dexter T. Uy maoy manguna sa mga dagkong kalihokan sa maong selebrasyon.
Sa gipahigayon nga coordination meeting sa Hall 3, Capitol Building niadtong Abril 27, gipangunahan kini ni OIC Provincial Administrator Charmie A. Yu uban sa Provincial Tourism Office nga gipangulohan ni Philetta A. Tiempo, ug gitambungan sa mga heads of offices ug mga komitiba nga maoy magdumala sa mga kalihokan.
Giaprobahan ni Governor Uy ang mga giandam nga aktibidad, ug iyang gipakita nga ang unang “Saulog” ilalum sa iyang administrasyon ipahigayon sa simple apan makahuloganon nga paagi.
Ang SOPA ni Gov. Uy gikatakda sa Hunyo 1, 2026 alas 9:00 sa buntag, nga maoy maghatag og direksyon sa mga polisiya ug programa sa probinsya.
Sa samang adlaw, ipahigayon usab ang Opening Program sa alas 7:00 sa gabii sa Saulog Stage, Dipolog Boulevard, diin si Senate President Vicente C. Sotto III ang mahimong Guest of Honor, kauban ang Costume Parade ug Street Dancing sa alas 4:00 sa hapon ug Saulog Queen Talent Night sa alas 8:00 sa gabii.
Samtang, padayon ang mga kalihokan gikan Hunyo 2 hangtod Hunyo 6, lakip ang LGU presentations, cultural events, job fair, awarding ceremonies, ug Founding Anniversary Program, ug matapos kini sa closing program ug celebrity concert sa Dipolog Boulevard.(IKEN B. GULLEM)
Source: Zamboanga del Norte Provincial News Network