Gipunting sa National Irrigation Administration–Zamboanga del Norte Regional Sub-Office (NIA ZDNRSO) ang pagpalapad sa solar-powered irrigation projects ug farm-to-market roads atol sa ilang courtesy meeting kang 3rd District Representative Adrian Michael A. Amatong niadtong Mayo 16 sa Barangay Ganase, Liloy.
Gipangulohan ni Acting Manager Engr. Rex L. Armentia ang NIA delegation nga nakigpulong sa kongresista aron hisgutan ang daghang prayoridad nga proyekto alang sa sektor sa agrikultura sa 3rd District.
Lakip sa ilang gihisgutan ang updates sa kasamtangang irrigation projects, rehabilitasyon sa service roads, ug mga programa nga makatabang sa farmers’ associations pinaagi sa Sustainable Livelihood Program (SLP) sa DSWD.
Gihisgutan usab sa duha ka panig ang datos sa irrigable lands aron mas mahatagan og tukmang plano ang umaabot nga agricultural projects sa probinsya.
Gipadayag ni Cong. Amatong ang iyang suporta sa mga inisyatiba sa NIA nga nagtumong sa pagpalig-on sa produksyon sa umahan ug paghatag og dugang oportunidad sa mga mag-uuma sa Zamboanga del Norte.(IKEN B. GULLEM)
Source: NIA Zamboanga Peminsula