Naghatag og relief assistance ang mga opisina ni Davao City First District Rep. Paolo Duterte ug Vice Mayor Rigo Duterte Rigo Duterte ngadto sa mga residente nga naapektuhan sa bag-ohay lang nga pagbaha ug sunog sa Davao City.
Mokabat sa 310 ka mga indibidwal sa Barangay 2-A ang nakadawat og init nga pagkaon human malunopan ang pipila ka purok tungod sa kusog nga ulan. Ang maong kalihokan kabahin sa paspas nga responde sa mga opisyal alang sa mga residenteng napahawa sa ilang mga panimalay.
Padayon usab ang pagpanghatag og ayuda sa mga pamilya nga naapektuhan sa sunog sa Barangay 23-C. Gipangulohan ni Vice Mayor Duterte ang distribusyon sa food packs, mga sudlanan sa tubig, ug essential kits ngadto sa mga apektadong panimalay.
Sumala sa mga otoridad, mokabat sa 466 ka pamilya ang naapektuhan sa sunog, diin 423 niini ang nakadawat na og tabang. Gibanabana usab nga mga 150 ka kabalayan ang nadaot human misaka sa ikaupat nga alarma ang sunog.
Padayon karon nga ginamonitor sa lokal nga mga opisyal ang kahimtang samtang naningkamot nga makabangon ang mga komunidad nga naapektuhan sa duha ka insidente.