Gibisita ni Dapitan City Mayor Evelyn T. Uy kaniadtong Huwebes ang kahimtangan sa karaang ospital, karaang city hall, ug Pavilion Hotel aron matino ang mga bahin nga nanginahanglan og rehabilitasyon ug pagpreserbar isip kabahin sa pagpanalipod sa makasaysayang kabtangan sa siyudad.
Atol sa inspeksiyon, gitutokan sa mayor ug sa iyang team ang pisikal nga kondisyon sa matag istruktura, lakip ang mga timailhan sa kadaut ug mga aspeto nga posible pang mapaayo. Ang karaang ospital, nga dugay nang simbolo sa serbisyong panglawas sa Dapitan, nagkinahanglan og madali nga atensyon aron mapadayon ang integridad niini ug masuportahan ang mga plano sa lokal nga gobyerno sa sektor sa panglawas.
Gipasiugda usab ang kahimtangan sa karaang City Hall, usa sa mga tinahod nga landmark sa siyudad, nga nanginahanglan og dugang nga interbensyon tungod sa mga epekto sa panahon. Samtang ang Pavilion Hotel, nga kabahin sa turismo sa Dapitan, gitan-aw alang sa posible nga modernisasyon ug restorasyon aron magpadayon nga magamit sa mga bisita ug turista.
Matod ni Mayor Uy, ang mga makasaysayang istruktura dili lang mga bilding kondili simbolo sa kasaysayan ug identidad sa Dapitan. Nagpadayon karon ang lokal nga gobyerno sa pagplano sa mga lakang sa rehabilitasyon ug konserbasyon aron mapreserbar ang kultura sa siyudad samtang magamit gihapon kini alang sa kasamtangan ug umaabot nga panginahanglan sa komunidad.(JENIFFER JR. DELICA)
Source/Photo Courtesy: Zamboanga del Norte Provincial News Network