Tugpa sa Hospital ang parehong Driver sa Single Motor ug Pick-up Ranger nga Nagsungag, didto sa National Highway, sa Barangay Opao, dakbayan sa Dapitan, ning Probinsiya sa Zamboanga del Norte, niadtong nakalabay’ng adlaw, Setyembre 04, 2025 sa may alas 11:45 sa dayon kaudtohon.
Base sa report sa Dapitan Pnp, nga adunay mitawag sa ilang buhatan nga usa ka concern citizen sa gamit ang cellphone, ug mitaho kini kabahin sa nahitabong Vehicular Incident sa nasangpit nga lugar, maong dali kining girespondihan sa mga personahe sa naasoy nga estasyon, ug sa paghidangat niini sa nahisgutang lugar, naabtan nila ang Single Motor nga atua na sa daplin sa National Highway, diin kini gimaneho sa usa ka Lalaking ana na sa 50 anyos ang pangidaron, ug Lumolupyo Poblacion North, Polanco, Zamboanga Del Norte.
Samtang ang kabanggaan niining Pick-up nga Ranger, nawad-an og kontrol sa manibela ang Driver niini, maong nahulog kini sa suba sa maong lugar, diin kini gimaneho sa usa ka 72 anyos nga Lalaking Lumolupyo sa Southwestern Poblacion, Calamba, Misamis Occidental, maingon man, aduna kini’y kauban nga sakay sa maong Pick-up, nga Lalaking anaa na sa 30 anyos ang pangidaron, ug Residente sa Brgy. Bonifacio, Calamba, Misamis Occidental.
Dugang pa nga pahayag sa Dapitan Pnp, nga matud pa, parehong naka-angkon og mga Injuries sa nagkadaiyang bahin sa kalawasan ang nasangpit nga mga biktima, nga maoy hinungdan nga dali kining gipangdala sa tambalanan, alang na sa Medical Treatment nga ilang gikinahanglan, diin ang 50 anyos nga Driver sa Single Motor, didto gidala sa Dr. Jose Rizal Memorial Hospital, sa Dapitan City, maingon man ang 72 anyos nga Driver sa Pick-up, ug ang kauban niining 30 anyos, didto gidala sa Corazon Aquino Hospital, Dipolog City.
Matud pa nga parehong nakaangkon og mga kadaot ang naasoy nga mga sakyanan, diin ang Motor Single atua na gidala sa Dapitan City Police Station, alang na sa tukmang disposisyon, diin ang Ranger nga Pick-up, atua nagpabilin sa dapit nahitaboan, tungod kay nakagbaton kini og kadaot sa iyang makina, tungod sa naasoy nga disgrasya, samtang padayon pa ang gibuhat nga imbistigasyon sa mga kapulisan, kabahin sa maong Incidente.(Julius Esmade)