Gisiguro sa Municipal Disaster Risk Reduction and Management Team (MDRRMO) ug Municipal Social Welfare and Development Office (MSWDO), kauban ang barangay officials, ang tinuod nga kahimtang sa mga residente sa Barangay Lawis, Sindangan Zamboanga del Norte, pinaagi sa on-site validation human maigo sa kusog nga balod o storm surge nga gidala sa Bagyong Tino kaniadtong gabii sa Nobyembre 4, 2025.
Base sa ilang panukiduki, 12 ka pamilya ang hingpit nga naguba ang mga puy-anan, 18 ka pamilya ang adunay partial damage, samtang 20 ka pamilya ang nakasinati lamang ug menor nga kadaut.
Isip inisyal nga tabang, ang LGU Sindangan mipanghatag ug relief goods ngadto sa 50 ka naapektuhang pamilya. Ang matag usa nakadawat ug 10 kilos nga bugas, 5 ka lata sa sardinas, 5 ka pack sa noodles, ug hygiene kits gikan sa DSWD Region.
Gipasalig ni Mayor Glona G. Labadlabad nga ihatag sa LGU ang shelter assistance alang sa mga pamilya nga nabahin sa totally ug partially damaged categories. Gi-awhag usab niya ang mga residente nga dili na magtukod ug balay balik sa baybayon tungod sa padayong peligro sa storm surge. Matud pa niya, maningkamot ang LGU pagpangita ug posible nga relocation sites aron masiguro ang kahimtang ug kaluwasan sa komunidad.(IKEN B. GULLEM)
Source: Local Government Unit of Sindangan