Mapasalamaton ang mga residente sa Sitio Budias, brgy. Sicayab, Dipolog City, tungod sa dali ug klarong aksiyon sa City Government ubos sa liderato ni City Mayor Roberto Y. Uy sa pag-atiman sa nagkagrabeng kadaot sa ilang dalan.
Nasayran kini pinaagi sa usa ka sulat nga gidawat sa Office of the Mayor niadtong Nobyembre 3, 2025, ug gipirmahan ni Atty. Perigrino S. Varquez, Attorney at Law/Notary Public, nga mitabang isip representante sa mga residente nga apektado sa naguba nga kadalanan.
Sumala sa maong sulat, dako ang ilang pagpasalamat kang Mayor Uy sa iyang walay pagduha-duha nga paghatag ug atensyon sa ilang hangyo, nga maoy timaan sa maayong pangagamhanan ug tinuod nga serbisyo publiko.
Gipasalamatan usab sa mga residente ang City Engineering Office sa ilang paspas nga pagresponde niadtong Oktobre 29, 2025, pinaagi sa pagbutang ug balas, graba, ug paggamit sa road roller aron mahapsay, mapalig-on, ug mapasig-uli ang kalig-on sa naguba nga dalan.
Nagpadayon ang panglantaw sa mga residente sa mas luwas ug mas maayong agianan tungod sa koordinasyon ug masaligan nga aksyon sa lokal nga pangagamhanan.(IKEN B. GULLEM)
photo courtesy: Dipolog City Government