Gihatagan og dugang nga suplay sa mga tambal ug medical supplies ang Sindangan District Hospital gikan sa Zamboanga del Norte Medical Center Medical Supply Warehouse niadtong Agosto 14 isip kabahin sa paningkamot sa Provincial Government of Zamboanga del Norte nga masiguro ang padayong serbisyo medikal sa lalawigan.
Duha ka sakyanan, usa ka Isuzu Forward ug usa ka Isuzu Elf truck, ang nagdala sa mga tambal, dextrose ug uban pang gikinahanglang medical supplies ngadto sa ospital. Gikatakdang magsilbi ang maong mga suplay alang sa mga pasyente karong bulana hangtod sa umaabot pang mga bulan.
Pinaagi sa maong pagpadala, gitumong sa PGZN nga malikayan ang kakulang sa mga tambal ug medical supplies ug masiguro nga adunay igo nga suplay ang Sindangan District Hospital alang sa adlaw-adlaw nga panginahanglan sa mga pasyente.
Padayon usab ang koordinasyon sa PGZN ug mga district hospitals aron mamonitor ang kahimtang sa ilang mga suplay ug mapadayon ang episyente ug walay hunong nga paghatag og serbisyong panglawas sa mga residente sa Zamboanga del Norte.(JENIFFER JR. DELICA)
Source: Zamboanga del Norte Provincial News Network