Usa ka Memorandum of Agreement (MOA) Signing Ceremony ang gipahigayon sa Roxas, Zamboanga del Norte aron pormal nga i-implementar ang “Stopping Cybercrime Against Children Project,” usa ka inisyatiba nga nagtinguha sa pagpanalipod sa mga kabataan batok sa mga hulga sa online world ug sa pagpasiugda sa ligtas nga digital nga komunidad.
Gipangulohan mismo ni Municipal Mayor Hon. Junior Rengquijo ang pagpirma sa kasabutan, kauban si Mr. Alfeo Del Rosario Bubutan ug mga representante sa mga partner agencies nga aktibong nagsuporta sa maong programa.
Ang proyekto nagpunting sa pagpahugot sa lokal nga kapasidad sa pagbatok sa cybercrime, ilabi na sa mga kaso nga naglambigit sa online exploitation ug digital abuse sa mga menor de edad. Lakip sa mga tinguha niini ang paghatag ug oryentasyon, kampanya sa kahibalo, ug teknikal nga pagsuporta alang sa mga barangay, eskwelahan, ug mga ginikanan aron maampingan ang mga bata sa paggamit sa internet.
Sa mensahe ni Mayor Rengquijo, mipasabot nga ang maong kasabutan usa ka dakong lakang sa pagpasiugda sa digital responsibility ug child online protection. Iyang gipasiugda nga kinahanglan nga magtinabangay ang lokal nga pangagamhanan, mga ginikanan, ug komunidad aron malikayan ang cyber exploitation ug mapatuman ang luwas nga online environment alang sa mga kabataan.(IKEN B. GULLEM)
Source: Roxas ZamboNorte