SIAYAN, Zamboanga del Norte — Nagpakita og kahanas, panaghiusa ug kahandam sa emerhensiya ang mga partisipanteng gikan sa lima ka barangay atol sa Barangay Fire Olympics 2026 nga gipahigayon sa Siayan Municipal Fire Station uban sa Municipal Disaster Risk Reduction and Management Office (MDRRMO).
Ang kalihokan gipangulohan ni Acting Municipal Fire Marshal SFO2 Elmer C. Alabata ug gitambongan nila Mayor Alberto “Ali” J. Bongcawel ug Vice Mayor Atty. Crisolgo A. Decierdo, nga nagpakita sa suporta sa lokal nga panggamhanan alang sa fire safety ug disaster preparedness.
Miapil sa kompetisyon ang mga representante gikan sa Barangay Dumpilas, Muñoz, Poblacion Siayan, Denuyan ug Gunyan diin ilang gipakita ang ilang abilidad sa nagkadaiyang fire ug emergency response challenges nga naghatag og praktikal nga kasinatian sa pag-atubang sa mga emerhensiya.
Sumala sa mga tigpasiugda, tumong sa maong kalihokan nga mapalig-on ang kapasidad sa mga barangay responders, mapauswag ang kahandam sa komunidad ug mapalambo ang kultura sa kaluwasan ug kalig-on batok sa kalamidad.
Pinaagi sa panagtinabangay sa BFP, MDRRMO ug lokal nga panggamhanan, padayon nga gipalig-on sa Siayan ang kahandam sa mga komunidad aron mas epektibong maatubang ang mga emerhensiya ug mapanalipdan ang kinabuhi ug kabtangan sa katawhan.(JENIFFER JR. DELICA)
Source: CRS Siayan MFS BFP RIX Zamboanga del Norte