Gisugdan sa Munisipyo sa Sibuco ang seryosong diskusyon alang sa pagtukod sa Sibuco Agricultural Industrial Economic Zone (SIAIEZ), usa ka dakong proyekto nga gilauman nga mahimong bag-ong sentro sa trabaho, pamuhunan, ug kalamboan sa habagatang bahin sa probinsya.
Sa konsultasyon nga gipangulohan nila Mayor Joel Ventura, Vice Mayor Absar Caril, ug mga miyembro sa Sangguniang Bayan, gipresentar ang plano sa economic zone nga tutok sa agrikultura ug kauban nga mga industriya. Gipasiugda nga ang SIAIEZ usa ka dugay nang panan-aw ni Congressman Amatong sukad sa iyang unang termino, nga gitumong dili lang alang sa Sibuco kondili alang sa mas lapad nga kaayohan sa tibuok distrito.
Mipakita og aktibong partisipasyon ang komunidad pinaagi sa paghatag og mga suhestiyon ug kabalaka aron masiguro nga ang proyekto moangay sa lokal nga panginahanglan. Mitapos ang konsultasyon nga adunay lig-on nga suporta gikan sa lokal nga panggamhanan ug katawhan, nga naglantaw sa SIAIEZ isip usa ka konkretong lakang padulong sa mas lig-on nga ekonomiya ug mas malinawon nga kaugmaon sa lungsod.(JENIFFER JR. DELICA)
Source: Zamboanga del Norte Provincial News Network